euskal diaspora eta kultura
2008/05/06
Igandean, zazpi lurraldeetako euskaltzaleak biltzen dituen Iparraldeko ikastolen aldeko Herri Urrats jaialdia ospatuko dute Lapurdiko Senpere herrian. Aurreko urteetan gertatu moduan, deialdian ez da euskal Diaspora faltako eta Buenos Airesen Iparraldeko Euskal Etxeak deia zabaldu die euskaltzaleei larunbaterako, jokoak, zozketak eta dantzak biltzen dituen egitaraua eratuz. Jardunaldian, pintxoak, ardoa, kalimotxoa eta zurrakapotea ere ez dira faltako. Antolatzaileek aditzera ematen dutenez, parte hartzeko interesa duten pertsona guztiek osteguna baino lehenago beharko dute eman izena.
2008/05/05
Brisbaneko Queensland Art Gallery aretoan ikusgai dago joan den larunbataz geroztik Lee Mingwei taiwandar artistak egin duen Picassoren 'Guernica' margoaren hareazko kopia bat. Erakusketa Gernikako bonbardaketaren 71. urteurrenarekin batera etorri da eta zalantzarik gabe oso berezia izango da inguru hauetako euskaldunentzat (Townsville-ko North Queensland Basque Club euskal etxearen inguruan antolatuta). Datorren ekainaren 9an artistak bere lana desegingo du eta ikusleei ere ekintza katarkiko honetan parte hartzeko gonbitea luzatuko die.
2008/05/05
Zaila da Frantzian gauzak mugi araztea euskara eta euskal kulturari batere ez duten gutxieneko babes ofiziala emateko. Hala ere, emeki eta pixkanaka urrats batzuk ari dira ematen, eta oraingoan badirudi gaia Pariseko Legebiltzarrera ekarria izango dela heldu den asteazkenean, maiatzaren 7an. Hizkuntza Gutxituen Euroagiria berrestearena dantzan da berriz ere. Garrantzitsua izan daitekeen Legebiltzarreko saio honen harira, agiri bat plazaratu dute Euskal Herriko eta Frantziako eskualdeetako hizkuntzetako elkarte ordezkariek. Eneko Bidegainek idatzi du artikulua Berria egunkarian.
2008/05/05
Mendozako 'Denak Bat' Euskal Etxeak zenbait jarduera antolatu zituen iragan asteburuan Gernikako bonbardaketaren 71. urteurrenaren karira, bertan hildako herritarrak omentzeko. Euskal Herriko paisaiak azaltzen dituen La mirada mágica sailarekin hasi zen ekitaldia eta ondoren pintxoen dastaketarekin eta pilota partiduekin jarraitu zuten. 'Bakearen Haritzak' izenaz bataiatutako 'Euskal Zelaia'-ren inaugurazioarekin eta euskal etxeko egoitza berrituan egindako dantzekin Mendozako komunitateak amaitutzat eman zuen ohoratze jardunaldia.
2008/05/03
Valparaisoko Eusko Etxeak bere sorreraren 65. urteurrena ospatuko du bihar, elkartearen kide eta lagunak bilduko dituen ekitaldi batean. Jaian pilota eta futbol txapelketak egingo dituzte eta hildako bazkideen omenezko mezaren ostean lagunarteko bazkariaz gozatu ahal izango dute. Bestalde, joan den apirilaren 18an Eusko Etxeak zuzendaritza batzordea hautatu zuen eta Archibaldo Uriartek lehendakari kargua berritu zuela.
2008/05/03
Iragan ostegunean Edurne Pasaban mendizale tolosarrak koska berria idatzi zuen bere curriculumean, Nepaleko Himalaiako Dhaulagiriren gailurrera igotzerakoan. Espedizioak Al filo de lo imposible izena izan du eta beste mendizale batzuk ere bazeuden bertan: Asier Eizagirre eta Alex Txikon euskaldunak, Ferran Latorre kataluniarra, eta hamalau zortzimilakoetara igo direnen zerrendan sartu berria den Ivan Vallejo ekuadortarra. Munduko hamalau tontorrik garaienak egitearen ametsean garaiera altuko lau mendi geratzen zaizkio gaina hartzeko: Shisha Pangma (8.046 m.), Annapurna (8.091 m.), Manaslu (8.163 m.) eta Kangchejunga (8.586 m.).
2008/05/02
Iparraldeko 'Autonomia Eraiki' taldearen ordezkaritza bat New Yorken izan zen joan den astean Nazio Batuen Herri Indigenen Foro Iraunkorrean (UNPFII) mintzatzeko. Bertan frantziar estatuari eskatu zioten sinatu duen Herri Indigenen Eskubideen Adierazpena errespetatu dezan. Taldekoen esanetan Iparraldeko euskaldunen egoera beste herri indigenen parekoa da eta beraz frantses estatuak adierazpenean defendatzen duen 'autonomia eskubidea' etxean ere errespetatu beharko luke. Taldeko kideek New Yorkeko Euskal Etxean ere mintzaldia eman zuten.
2008/05/02
Los niños de Guernica tienen memoria dokumentalak Gerra Zibiletik eta Gernikako bonbardaketatik Ingalaterrara ihes egin behar izan zuten 4.000 haur euskaldunen istorioa kontatzen du. Drive produkzio-etxeak ekoiztu du lana eta iragan igandeko ordu txikietan La Sexta telebista katean estreinatuta, Gernikako bonbardaketaren 71. urteurrenarekin batera. Lanak artxiboko irudiak eta denboraldi batez babeslekurako kanpamenduan bizitako zenbait pertsonen testigantzak biltzen ditu.
2008/05/01
2008/05/01
Hiru Erreka Euskal Etxea Tres Arroyoseko komunitatearekin lankidetza estuan aritu ohi da, ekintza kulturalak eta sozialak gauzatuz. Lankidetza horren azken emaitza Patrimonio Tresarroyense izeneko sarien edizio berri bat da. Joan den apirilaren 27an jaso zituzten sari hauek Tres Arroseko Alberto Hugo Mac Lean, Freddy Guillermo Wolfram, Mario Alberto Arias, Ernesto Juan Di Francesco eta Arminda López herritarrek. Euskal Etxeak azaldu zuenez euren ibilbide eta ekarpen pertsonalarekin hiriko izpiritu eta ondarea osatzen lagundu dute bizitza osoan zehar.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
