euskal diaspora eta kultura
2008/05/17
Euzko Etxeak eta La Platako Unibertsitate Nazionalak (UNLP) antolatu duten ekitaldiak lagundu nahi du Buenos Aires probintziako hiriburuak dituen kantxak berritzeko behar den dirua lortzen. FMP Master Kopak (Pilota Federazio Metropolitarra) pilota paletako zenbait bikote bilduko ditu Euskal Etxearen egoitzako trinketean asteartean eta datorren hilaren 27an egingo diren kirol jardunaldietan: Jorge eta Gabriel Villegas, Cristian Ferreras eta Emiliano Narbaits, Andres Dick eta Luis Cimadamore, eta Adrian Peloni eta Justino Viton lehiatuko dira.
2008/05/16
2008/05/16
Kepa Junkera konpositore, ekoizle eta trikitilari bilbotarrak ez du atsedenik hartzen bere lanean eta konposatzen, kontzertuak ematen eta Euskal Herritik kanpo birak eskaintzen jarraitzen du. Hego Amerikan egindako azkeneko bidaian bizkaitarrak bideoklip bat grabatu zuen 2006ko 'Hiri' diskoarekin eta orain Youtube webgunean dago ikusgai. Era berean, bideoak igo, ikusi eta konpartitzen uzten duen interneteko orrialdeak Kepa Junkeraren kanal berezia eskaintzen die erabiltzaile eta jarraitzaileei musikariaren ikus-entzunezko lanak eskainiz.
2008/05/16
Patxi Baztarrika, Eusko Jaurlaritzako Hizkuntza Politikarako sailburuordea, Mexikora heldu zen atzo, Argentinan hasi zuen bidaia ofizialaren bigarren zatiari ekiteko. Sei egun emango ditu Mexikon eta egonaldian zehar hainbat unibertsitate mexikarretan eskaintzen diren euskara eta euskal kultura lektoretzen jarraipena egingo du. Era berean, ikastaro hauek eman nahi dituzten beste unibertsitateetako arduradunekin ere bilduko da.
2008/05/16
Zenbait euskal kirolari arituko dira abuztuaren 8an Beijing-en hasiko diren Joko Olinpikoetan. Horien artean Maider Unda arabar kirolaria egongo da. Emakumezkoen borroka praktikatzen du Undak 72 kiloko kategoria Olinpikoan eta duela hilabete batzuk blog bat sortu zuen munduan zehar burutzen ari den entrenamendu prozesua internetez azaltzeko. Hilaren hasieran Colorado Springs hirira bidaia egin zuen entrenamendu saioa egiteko. Bertakoa, Estatu Batuetan dauden lau Entrenamendu Gune Olinpikoetako bat da New York, California eta Michiganekoekin batera.
2008/05/16
Pozik daude Santa Feko Gure Etxea elkartean, azken hilabeteetan egin dituzten ekitaldiak direla eta. Euskal Etxeak ekimen horien berri eman dio EuskalKultura.com-i, martxo-apirileko egitaraua azpimarratuz eta datozen ekimenetako batzuk iragarriz. Aberri Eguna, adibidez, elkarteko bazkide eta lagun ugari bildu zituen bazkari batez ospatu zuten eta, joan den igandean, Kolektibitateen Azokako hamabostgarren urteurrenaren jaian ere parte hartu zuten, besteak beste.
2008/05/16
Buenos Aires Hiri Autonomoko Laurak Bat Euskal Etxeak Zuzendaritza berritu duela adierazi du ohar baten bidez. Agintealdi berria hasia duen Zuzendaritza Batzorde berriak Jon Kepa de Erquiaga izango du berriz ere lehendakari, eta berarekin batera arituko dira José María Landa, lehendakariorde, Arantxa Goicoa, idazkari, Enrique Fagoaga, idazkariorde, Eduardo Lizaso, diruzain, eta Maria Teresa Anitua, diruzainorde.
2008/05/15
Mexikoko EmpreBask-ek, Euskal Jatorria Duten Enpresarien Elkarteak alegia, deialdia luzatu du Mexikar Errepublikako Erdigunean euskal eta jatorri euskalduna duten enpresariekin bilera antolatuz bihar Celaya hirian. Erakundearen antoilaketa eta jarduera azaltzeaz gain, gaurkotasuneko bi hitzaldi egitarautu dituzte antolatzaileek. Mexikoko euskal enpresarien asmoa aldiro biltzea da, elkarren arteko interesak zeintzuk diren ikertzeko eta EmpreBask baliatuz eman ditzaketen urrats berriak bultzatzeko.
2008/05/15
Euskal standa Living Traditions-eko klasikoetako bat bihurtu da, 1986an lehen aldiz Utah Basque Club-eko bazkideek jaialdian parte hartzeko elurte gogor bati aurre egin behar izan ziotenetik. 22 urte pasa dira eta Utahko talde etnikoen eraskuslehio izateko asmoz jaio zen ekitaldia, 45.000 bisitari baino gehiago biltzen dituen jaialdi erraldoia bihurtu da. 'Gure ohiturak eta gastronomia munduan zehar ezagunak dira. Horiek mantendu eta gure seme-alabei erakustea da gure asmoa', azaltzen du Mary Gaztambidek, euskal etxeko lehendakariak, Salt Lake Tribune egunkarian argitara emandako elkarrizketan. Bihar bertan hasiko da jaialdia.
2008/05/15
Musikaste 2008 Errenteriako Musika Asteak Juan Garcia de Basurto musikagilearen lana aurkeztuko du gaur, Capilla Peñafloridak Josep Cabréren gidaritzapean emango duen kontzertuarekin. Basurto Espainiako Felipe II.aren gortean eta Cisneros kardinalaren agindutara kapera maixu bezala aritu zen eta lan garrantzitsuen egilea izan zen, nahiz eta horietako gutxi gordetzen diren gaur egun. Musikastek ikerketa lan zabala egin du gureganaino heldu diren partiturak bilduz eta gaur Errenazimenduko egile honen lana erakutsiko du kontzertu honetan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
