euskal diaspora eta kultura
2008/06/03
Eusko Ikaskuntzak Asmoz Fundazioko internet bidezko Eusko Ikasgaietan Graduondokoa egiteko Diasporako ikasleentzako matrikularen osotasuna ordaintzen duten hogei beka eskaintzen ditu. Ikastaroa munduko edozein tokitik egin daiteke, klaseak eta ikas-materiala internet bidez jasotzen dituztelako ikasleek. Ikastaroa lizentziatu eta diplomatuei zuzendua dago eta nahiz eta datorren urrian hasiko den, beka eskuratzeko aukera izan nahi dutenek hilaren 15a baino lehen eman behar dute izena. Non eta nola, artikulu honetan azaltzen dizugu.
2008/06/03
Azken egunetan EuskalKultura.com-en gure irakurleen mezu dexente jaso ditugu, Sakelako Hiztegia izeneko euskara-gaztelania / gaztelania-euskara hiztegia Diasporatik telefono mugikorretara nola jaitsi daitekeen galdetuz. Sakelako Hiztegia sustatu duten Donostiako Euskara Patronatoarekin eta Eleka Ingeniaritza enpresarekin harremanetan jarri gara, gure irakurleen zalantzak argitu nahian. Hiztegia munduko edozein lekutik deskargatu daiteke, wap sistema edo internet bidez, jarraian azaltzen ditugun pausu erraz hauek jarraituz.
2008/06/03
Argentinako Chaco probintziako 'Kotoiaren Lurra' Euskal Etxeak azken asteetan egindako eta datozen egunetan egin beharreko jarduerei buruz eman du aditzera. Iragan maiatzaren 25ean, bertako bazkideek Resistenciako Udalak antolatutako Maiatzaren 25eko aberri desfilean parte hartu zuten. Bihar, bestalde, Euskal Zine Zikloari ekingo dio Euskal Etxeak, 'Aupa Etxebeste' filmearekin, eta bihar bertan baita ere ekingo dio bere lehenengo bilkurari Euskal Abesbatza sortzeko lanean ari den taldeak, interesa izan dezaketen guztiak gonbidatuta daudela.
2008/06/02
Eusko Jaurlaritzak aurten euskal etxeak dauden lurraldeetan bira kulturalak egiteko deialdian laguntza lortu duten talde eta artisten zerrenda argitaratu du. Horietako batzuk dagoeneko egin dituzte euren emanaldiak, baina datozen hilabeteetarako honako kontzertu eta bira agenda iragar dezakegu: Trikizio (AEBetan), Maddi Oihenart (AEBetan), Antton Valverde (Argentinan), Aretxabaletako Akordeoi Orkestra (Argentinan), Juan Mari Beltran (Argentinan), Elai Alai Dantza Taldea (Kolonbian) eta Araba Korala (Argentinan).
2008/06/02
Patagonia aldeko euskal argentinar elkarteak oso pozik agertu dira joan den maiatzaren 17 eta 18an General Roca herrian egin zen Patagoniako Euskaldunen Lehen Topaketaren emaitzarekin. Giroa aparta izan omen zen, hara bertaratzeko aukera izan zutenen esanetan, eta orain mundu osoko euskaldunek zuzenean ikusteko aukera izango dute Gure Etxeako antolatzaileek euren webgunean jarri duten argazki sortari esker. Eurek azaltzen dutenez bideoak igotzeko aukera ere badago eta topaketan izan zirenei euren argazkiak eta ikusentzunezko materiala bidaltzeko gonbitea egiten diete.
2008/06/02
Hona, irakurle, EuskalKultura.com-en bertsio berritua. Erditze ahalegintsua, baina emaitza sendotuz geroa erraztuko duena deritzogu. Erabateko aldaketa da, Diasporak dauzkan harreman eta komunikazio alorreko beharrei hobeto zerbitzatu nahiak bultzatua. Beta bertsioa da esku artean daukazuna. Datozen egun eta asteetan pixkanaka moldatzen, zuzentzen, fintzen eta gehitzen joango gara, eta lan horretan ere partaide nahi zaitugu. Izan ere leku eta esparru berriak zabaldu dizkiogu buletin berrian partaidetzari. Emaizkiguzu guztia sendotzeko aste batzuk, eta ondoren iritzia eskatu eta eskertuko dizugu.2008/06/02
EuskalKultura.com buletina, harpidetza bidez irakurtzen zutenek berritasun batzuk izango dituzte aurrerantzean. Batetik, beta bertsioan gauza berriak saiatu nahi ditugu eta, aproba gisa bederen, buletinaren emisio orduak aldatuko ditugu. Lehenengo asteetan, arratsaldeko zortzietan izango da egunero emisioa, Euskal Herriko ordua; beraz arratsaldeko hirurak direla Argentinan edo goizeko hamaikak, esaterako, Kalifornian. Bestalde, albiste berriak argitaratu ahala irakurtzeko aukera gehitu dugu, RSS esaten zaion zerbitzu baliagarria.
2008/06/02
Jose C. Pazeko Toki Eder Euskal Etxeak, Argentinan, deia luzatu die kantua gogoko duten pertsona guztiei sortu berri duen abesbatzara bil daitezen. Honekin batera, bazkideek zein oro har josezepaztarrek euskal kultura sakonago ezagut dezaten abian jarri duen 'La hora de los vascos' irratsaioaren berri eman du. Saioa astean behin, ostegunetan, eskaintzen dute Sintonia AM 1000-n eta entzuleek interneten bidez ere jarraitu dezakete emisioa, munduko edozein bazterretik.
2008/06/02
Venezuelako hiriburuko Eusko Etxeak zenbait jarduera antolatu eta egin ditu azken asteetan, tartean Eneko Etxeberria eta Miyuki Okabe senar-emazte ibiltarien 'Mundua Hurbiltzen' hitzaldia, euskal etxearen egoitzan bertan. Europa, Asia, Ozeania eta Amerikan zehar bizikletaz hasi zuten bidaiaz mintzatu zen bikotea eta Eusko Etxeak, berriz, 'ezohiko kide' izendatu zituen. Bestalde, Caracaseko euskaldunek 'Amatxuen Eguna' ospatu dute hirugarren urtez jarraian. Bildutako ama eta gainerakoek askaria eta familia giroko bingoaz gozatu ahal izan zuten.
2008/06/02
San Juango Eusko Etxea Euskal Etxetik, azken aste eta hilabeteotan euskal esparruan egindako ekitaldien berri eman digute. Aurretik atzera, Maiatzeko Iraultzaren bigarren mendeurrenaren ospakizunean hartu zuten parte, euskal jatorrikoen ordezkari, omenaldia eskaini zieten 1937an Gernikako bonbardaketan hildako herritarrei, Euskal Zine Zikloaren inaugurazioa ere egin dute, eta 'Gure euskal kultura gehiago ezagutu dezagun' hitzaldi sorta abiarazi.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
