euskal diaspora eta kultura
2008/06/17
Mexikoko EmpreBask-ek euskal eta jatorri euskalduna duten 50 bat enpresari bildu ziren iragan maiatzaren 16an Celayan (Mexiko), elkartearen aurkezpeneko ekitaldian. Xabier de Arondo Guanajuatoko Celaya herriko Ekonomia Garapenerako Kontsulta Kontseiluko lehendakariak eta Yon de Luisa Bajioko zonako enpresari eta aholkulari euskaldunak antolatu zuten bilera eta hitzordua arrakastatsua izan zen, haien esanetan. Euskal-mexikar erakundearen funtzionamendua eta elkarteko kidea izateak dituen onurak jorratzeaz gain, bertaratutakoek EmpreBasken bidez elkarrekin lan egiteko oinarriak finkatu zituzten.
2008/06/16
Hamaika Bide elkarteak bere bederatzigarren nazioarteko mintegiak izango duen gaia iragarri du: antzerkia eta erbestea. Mintegia Donostian egingo da, azaroaren 5etik 7ra, eta bertan erbesteko ‘arlo ezezagunenetarikoa’ den antzerkigintzan sakonduko dute herrialde desberdinetako hainbat adituk. Jardunaldietan Euskal Herriarekin harreman estua duten hainbat egileen lana aztertuko dute: besteak beste, Eduardo Ugarte, Cecilia G. de Guilarte, Telesforo Monzon, Pepita Embil, José Bergamín, Martín Ugalde eta Alfonso Sastre. Azken honek, José Martín Elizondo eta Ricardo Doménech-ekin batera omenaldia jasoko du Hondarribian.
2008/06/16
Etxepare Beka deritzon deialdiaren III. edizioa jarri dute abian Nafarroako udaletako Euskara Zerbitzuek, aurtengo edizioko irabazleen izenak jakinaraztearekin batera. Beka honen bidez album irabazlearen egileak 6.000 eurotako saria jasoko du eta Pamiela argitaletxeak plazaratuko dio lana euskaraz (‘Faktoria K de libros’ argitaletxeak gaztelaniaz eta galegoz). Lanak bidaltzeko epea azaroaren 28an bukatzen da. Aurten irabazleak Jose Antonio Ormazabal Berastegi idazlea eta Iraia Okina Salazar ilustratzailea izan dira, ‘Zirkua amets’ lanarekin.
2008/06/16
Jon Baguesek, Eresbil Musikaren Euskal Artxibo Nazionaleko zuzendari eta AIBM Musika Liburutegien Nazioarteko Elkarteko lehendakariordeak, ikastaro bat emango du bihartik eta larunbata bitartean La Platako Unibertsitate Nazionalean (UNLP). Horrez gain, bi hitzaldi eskainiko ditu La Platako Euzko Etxean eta Buenos Aireseko Eusketxe Eusko Kultur Etxean. Bestalde, Baguesek hainbat bilera izan zituen iragan ostiralean argentinar hiriburuan, AIBM elkartea Hegoamerikan zabaltzeko asmoarekin.
2008/06/16
Euskal jatorrizko haurrak errezibitzeko eguna izan zuten atzokoa Buffalon. 42 haur dira aurtengoan, gehienbat bat Estatu Batuetako sei estatutatik (Kalifornia, Idaho, Kalifornia, Oregon, Utah eta Wyoming), baina baita Kanadatik (2), Euskal Herritik (1) eta Espainiatik (1) ere etorriak. Ia bi astez Buffalon eta Wyoming-eko mendietan ibiliko dira, izadiarekin zein euskal kulturarekin harremanetan. Euren sustraiei buruz ikasiko dute, baina batez ere ongi pasatuko dute, lagun berriak eginez, lagun 'euskaldunak, agian bizitza osoan lagun iraungo duten lagunak', bertatik esan zaigunez.
2008/06/16
Gerra Zibila piztu zenean 1936. urtean, Euskal Herriko milaka haurrek erbestera ihesi egin behar izan zuten, euren gurasoengandik aldenduz. Horietako batzuk etxera itzuli ziren guda amaitu ostean, baina beste askok urteak pasa dituzte atzerrian familiatik urrun. Haur hauei guztiei omenaldia egiteko oroimenezko zenbait jarduera egin dira iragan astean: erbesteratutako umeen eskutitz eta marrazkien erakusketa, Santurtziko portuan egindako lore eskaintza eta Bilboko Euskalduna Jauregian burututako ekitaldiak omenaldizko astea biribildu zuten. Bertan, 500 pertsona baino gehiagok parte hartu zuten eta gerrako zenbait haurrek euren testigantzak eskaini dituzte.
2008/06/16
2008/06/15
Mexikoko Euskal Etxeak eta Mexikoko Unibertsitate Nazional Autonomoak (UNAM) euskara ikasten duten ikasle talde ugaria biltzen dute. Gabriel Ceballosek hiru urte daramatza Euskal Etxean klaseak ematen eta Gurutzne Etxeberriak gauza bera egiten du UNAMen Euskara eta Euskal Kultura Ikastaroa irakatsiz. Klaseak momentu batez alde batera utzi eta euskara beste esparru batean praktikatu eta ongi pasatzeko, ikasle guztientzako bi afari antolatu dira Txokoan.
2008/06/14
Argentinako beste hamaika puntutan bezala, Villa Mercedesen, Euskal Etxeak, Maiatzaren 25ari lotutako argentinar aberri eguna ospatu zuen. Ospakizunean gastronomiak ere hartu zuen bere lekua. Euskal Herritik etorrita zenbait euskal etxe eta komunitateetan ibiltari dabilen Susana Rodriguez sukaldariak 'euskal paella' prestatu zuen propio hitzordurako. Horrekin batera, Villa Mercedeseko EEri atxikitako Camerata de la Luna abesbatzak euskarazko abestiak kantatu zituen. Bildu zirenen artean, Bragadoko Danak Anaiak Euskal Etxeko lehendakaria ikus zitekeen.
2008/06/13
'Exilio y Universidad (1936-1955). Presencias y realidades' liburua Hamaika Bide elkarteak 2006ko abenduan Donostian egin zuen nazioarteko mintegian aurkeztu ziren lanen bilduma da. Jose Angel Ascunce, Mónica Jato eta María Luisa San Miguel ikerlari eta adituek prestatu duten liburu honen bidez irakurleek 36ko gudak eta Francoren diktadurak behartuta erbestera jo behar izan zuten euskal eta iberiar penintsulako pentsalariek egin zuten ekarpen intelektualean sakondu ahalko dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
