euskal diaspora eta kultura
2008/08/06
Mar del Platako Denak Bat Euskal Etxeak bere 65. urteurrena ospatu du, ekitaldi eta jarduera ugarirekin: pilota partidak, mintzaldiak eta euskal kulturaren inguruko erakustaldi eta jaialdiak, besteak beste. Urteurreneko ekitaldiei bukaera emanez elkarteko kide eta lagunek afaria egin zuten Euskal Etxean. Jende asko bildu zen hitzordura eta Beti Alai taldeko dantzariek erakustaldia eskaini zuten.
2008/08/06
Mar del Platako Denak Bat Euskal Etxeak bere lehenengo Emakumezkoen Pala Txapelketa antolatu zuen joan den uztailean, elkartearen 65. urteurreneko ekitaldien barruan. Txapelketan Denak Bateko Beti Alai dantza taldeko neskak aritu ziren gehienbat eta ekitaldia oso bizia izan zen. Bestalde, La Platako Euzko Etxeak elkarteko honetako Gabriel Villegas eta Gustavo Cangas pilotariek Buenos Aireseko Federación Metropolitana de Pelota erakundearen Apertura Txapelketa irabazi dutela jakinarazi du.
2008/08/06
Uztailaren 26tik abuztuaren 2ra bitartean Arrecifeseko Euskaldunak Denak Bat euskal etxea HABEk antolatu duen lehenengo nazioarteko barnetegiaren egoitza izan da. Aurreko barnetegietan Argentina eta Uruguaiko partaideak zeuden, baina oraingo honetan esperientzia nazioartekotu eta Txile, Kolonbia, Peru eta Brasilgo kideek ere hartu dute parte. Kasu batzuetan milaka kilometro egin dituzte bertan ikasle, euren herrialdeetan irakasle ere izango diren gazte hauek euskal kulturarekiko maitasunak bultzatuta. Euren esanetan "oso aberasgarria" izan da. "Barnetegian elkarrekin aritzeak, ikastearekin batera, beste herri batzuetako ikasleekin esperientzia desberdinak konpartitzeko aukera ematen baitigu".
2008/08/05
Hiru urte beteko ditu abuztuaren 26an Corpus Christi-ko Euskal Etxeak, Misiones probintzia argentinarrean, eta elkarteko lehendakari Olga Leiciagak atzera begiratua egin du EuskalKultura.com-en orrialdeetan, bide honetan burututako ekitaldi eta lorpenen balioespena eginez. Mintzaldiak, euskal kulturaren sustapena eta herriko bizitza sozial eta kulturalean parte hartzea izan dira elkartearen nortasun ezaugarriak denbora honetan. Eta etorkizunerako proiektu berriak dituzte dagoeneko esku artean.
2008/08/05
Inor gutxi harritu duen erabakia bada ere, orain ofiziala da: John Garamendik 2010eko hauteskundeetan Kaliforniako gobernadore izateko bere hautagaitza aurkeztu du, bere bizitza osoko erronkarik handienari ekinez. Estatu Batuetako Utah-ra emigratu zuen Saturnino 'Sam' Garamendi lekeitiarrak nekez sinetsiko zuen urteak pasatuta bere biloba batek AEBetan eta mundu mailan ere agintari boteretsuenetako bat bilakatzeko aukera izango zuenik. Bere bizitza politikoko 'egiaren unea' du honakoa egun gobernadoreorde hautetsia den Garamendik. Eta, gauzak ongi bideratzen baditu eta bere abilezia eta gaitasun guztia lanean jartzen baditu kartak baditu partida hau jokatzeko. Ikusiko al dugu iaz bertan San Frantziskoko Euskal Etxean zapi gorria lepoan zebilen euskal-amerikar hau Sacramentoko Kapitolioko buru?
2008/08/05
Ugaltzen ari diren eskakizunei erantzunez, Eusko Jaurlaritza fresatzeko makinen dohaintza egiten ari zaio tokiko euskal etxea medio hala eskatu duen Argentinako eskola teknikori. Honela gertatu da azken asteotan Chascomus, Saladillo, Las Flores eta Carlos Casaresen. Pergaminori dagokionez, emate ekintza ofiziala uztailaren 18an egin da. Lagun Onak-eko agintariak, FEVAko idazkaria eta Cesar Arrondo kudeaketaren bideratzailea bertan zirela eman zitzaion tresna Pergaminoko 1 zenbakidun Eskola Teknikoari. Ekitaldia bukatuta, bildutakoak euskal etxeak urtero eratzen duen ‘Eusko Azoka’-ra murgildu ziren.
2008/08/04
Amaiur dantza talde iruindarra gaur bertan abiatuko da Eskozia aldera, Edinburgh-era zehazki, urtero hiri honetako kaleak dantza, musika eta antzerki emanaldiz betetzen dituen Edinburgh Fringe Festival jaialdian parte hartzeko. Bidaiak gainera arlo oso berezia izango du, taldeak eskainiko dituen emanaldietako batzuk garun paralisia duen 16 urteko neska eskoziar bati unibertsitatean ikasketak egiteko dirua biltzen laguntzeko izango dira eta. Honez gain Amaiurrek eskoziar dantza talde batekin batera dantza ikastaro-tailerra egingo du, elkarri bakoitzak bere dantzak erakutsiz.
2008/08/04
Hamaika Bide elkarteak edukin berriak aurkeztu ditu bere webgunean, beti ere erbesteko euskaldunen historia eta ekarpenak ezagutzera emateko lanetan. Azken berritasunen artean webguneak Sebastian de Amorrortu (Bilbo, 1867-Buenos Aires, 1949) euskaltzale handiaren biografia dakar, 'Hileko pertsonaia' atalaren barruan. Beste edukin batzuk ‘Ernestina de Champourcin-Carmen Conde. Epistolario. 1927-1995’ liburuaren aipamena edo Ameriketan ibilitako bi lekeitiarren testigantzak dira.
2008/08/04
Elkarteko arautegiak agintzen duenari jarraiki, hauteskundeak egin berriak ditu Buenos Aires probintziako Mar del Plata hiri argentinarreko 'Denak Bat' Euskal Etxeak. Uztailaren 26an eginiko Ohiko Batzar Orokorrak hartutako erabakiei segituz, hilaren 29an egindako bilerak datorren agintealdian elkartea gobernatuko duen Zuzendaritza Batzordea izendatu zuen, Jose Martin Azarloza lehendakari, Ana Maria Irigoyen eta Horacio Ayesa lehendakariorde eta Francisco Valencia diruzain, besteak beste.
2008/08/04
Albisteak hainbat jende kolpatu du Euskal Herrian zein Estatu Batuetan. Felix Menchacatorre, egun AEBetako hainbat unibertsitatetako ikasleak atzerrira egonaldiak egitera bidaltzen dituen USAC --'University Studies Abroad Consortium'-- erakunde estatubatuarreko Espainiako estatuko koordinatzailea tupustean hil da joan den ostiralean, ikasle talde batekin Santiago Bidea egiten ari zela, bihotzekoak jota dirudienez. Getxoztarra zen Menchacatorre, eta 25 urtetik gora zeramatzan jatorri euskalduneko ikasle estatubatuarrak Euskal Herrira ikastera bidaltzeko programa bezala hasi zen USACen. Bertako lankide eta lagunak, familia bezala, zinez ezustean harrapatu ditu 59 urte zituen irakaslearen heriotzak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
