euskal diaspora eta kultura
2008/09/11
Argentinako Jose C. Paz hiriko Toki Eder Euskal Etxeak eta Javier Zuvillaga egileak EuskalKultura.com-eko irakurleekin partekatu nahi dute 'Goxoa' pintxoaren errezeta. Errezeta honekin elkartearen I. Pintxo Lehiaketa irabazi zuen joan den abuztuaren 16ean Zuvillagak. Ekimen honekin datozen edizioetan elkartera lagun eta bazkide asko bilduko dituen hitzordu arrakastatsuari hasiera eman diote elkartean. Bertara joan ezin eta pintxoa dastatzeko gogoarekin gelditu direnentzat, jarraian errezeta eskaintzen dugu. On egin!
2008/09/11
'Kontzertuak iraun zituen bi orduak konturatu orduko pasa egin ziren', azaltzen zion EuskalKultura.com-i euskal musiakariak larunbatean eman zuen kontzertuan izan zen entzule batek. Bertara bildu zen jendearten arabera emanaldia 'oso ederra' eta 'paregabea' izan zen. Txalaparta, alboka, txistu, ttun-ttun, burruna eta trikitixa bezalako musika tresnak, paraje hauetan nekez ikus daitezkeenak, izan ziren kontzertuaren izarrak eta entzuleek jakinminez eta harriduraz hartu zituzten. Montevideoko Haize Hegoak antolatu zuen Uruguaiko emanaldi honen ostean, Beltranek Argentinako Chivilcoy-en eta Arrecifes-en eman ditu kontzertuak, eta gaur bertan bukatuko du bira, Buenos Aireseko Centro Cultural Plaza Defensa-n emango duen kontzertuarekin (20:00). Bertara joan ezin dutenentzako, Montevideoko kontzertuaren kronika eta argazkiak, hemen.
2008/09/11
Euskal Gizataldeen Munduko Mus Txapelketa erdi bidean da. Lehen bi jardunaldiak jokatuta Euskal Herriko bikotea da txapelketaren buruan, 3 partida irabazi eta bakarra galduta. Ondoren, hurrenez hurren, Estatu Batuak, Katalunia, Espainia, Frantzia, Kanada eta Australia daude sailkapenean. Mus txapelketaz gain Kataluniako kultura eta hainbat leku interesgarri ezagutzeko aukera dute bai muslariek eta baita beraien bidaiakideak ere. Gaur Kataluniako egun nazionala denez bazkari batekin ospatuko dute, eta horretarako Enkartur Bizkaiko Enkarterrietako taldea arituko da sukaldean Euskaltzaleak elkartean.
2008/09/10
Josune Amunarriz, Ines Medina, Itziar Barrio, Amaya Arberas... lau euskal artista hauen izenak entzungai izango dira datozen hilabeteetan New Yorkeko arte eta kultur giroetan. Itziar Barrio bilbotarrak bere artelan multimedien irudiak biltzen dituen 'Pink Car Crash' liburua argitaratuko du eta Josune Amunarriz hondarribitarrak margolanak erakusgai jarriko ditu Queen Sofia Institute erakundean. Institutu honetan bertan kontzertua eskainiko du Amaya Arberas soprano donostiarrak urrairen 30ean. Azkenik, Ines Medina margolari bilbotar - newyorktarrak erakusketa egingo du Connecticut-eko Stamford-en.
2008/09/10
Chascomuseko Zingirako Euskaldunak Euskal Etxe argentinarrak joan den abuztuaren 31an Euskal Dantza Gaua antolatu zuen hiriko Brazzola Antzokian. Ekitaldian euskal etxeko dantza taldeak erakustaldia eskaini zuen eta txalo zaparrada jaso zuten dantzari gazteek. Gainera elkartasun ekimen bat burutzeko parada ere hartu zuten, eta Chascomuseko 45. eta 3 . Eskolentzako janari dohaintza egin zuten.
2008/09/10
Hamar urte bete ditu EuskoNews astekari digitalak kultura eta zientzia internetez hedatzen, oraintxe 90 urte betetzen dituen Eusko Ikaskuntza erakundeak sustatuta. 1998ko irailaren 8an sareratu zen lehen aldiz, eta harrez gero, '452 zenbaki, 116 monografiko, 9.500 artikulu baino gehiago eta 2.722 kolaboratzaile' pasa dira sareko euskal topagune honetatik, arduradunek EuskalKultura.com-i adierazi diotenez. Kolaboratzaile horien artean munduko euskaldun asko ere izan dira, euskal etxe eta atzerriko euskal gizataldeen historiaren berri emanez Kosmopolita atalaren bidez. 'Atal honek izugarrizko harrera izan zuen, batez ere Diasporako euskaldunen artean', azaltzen du Euskonews-eko zuzendari Arantxa Cuestak. 'Izan ere, argitaratu ditzakegun baino artikulu gehiago bidaltzen dizkigute'.
2008/09/09
Pasa den asteburuan egin zen Bartzelonako Euskal Etxean Europako Euskal Etxeen II. Bilkura. "Oso positiboa eta aberasgarria izan da, izan ere, urte osoan urruti garenez, garrantzitsua da elkarrekin urtean behin behintzat egotea", azaldu dio EuskalKultura.com Bartzelonako elkarteko lehendakari Aitor Arrutik. Elkar ezagutu eta amankomunean dituzten berdintasun eta ezberdintasunez jabetzeaz gain, Europako Euskal Etxeen I. Argazki Lehiaketa antolatzeko ekimena abiazten ari dira. Berlin, Frankfurt, Montpellier, Bordele, Paue, Parise eta Mallorkako ordezkariek hartu dute parte bertan.
2008/09/09
Duela 80 bat urte, gazte euskaldun batzuek leku egoki bat behar zuten euren ekimenak eta idealak loratzen ikusteko. Hori dela eta, indarrak batu zituzten eta, dirulaguntzarik gabe, Gure Echea erakundea sortzea lortu zuten. Gaur egun, haien ahaleginaren isla ikus daiteke Buenos Aireseko Balvanera auzoan, Juan Domingo Peron kaleko 2143. zenbakian. Pilota eta igeriketa dira nagusiak orain eskaintzen dituzten kiroleen artean. Kulturaren alorrean, berriz, hamabost urte bete dituen Alkartasuna Korala da etxeko altxorra.
2008/09/09
Getaria lapurtarreko "Saraleguinea" museoak erakusketa antolatu du urriaren 31 arte Jacques-Hippolyte Lescaren bizitza eta ibilbideari buruz. Bere lehenengo mendeurrena betetzen ari den "Saraleguinea" etxea J.H. Lesca indianoak eraiki zuen Rio de la Platatik itzultzean. Gizon lapurtar honek garrantzi handia izan zuen XIX. mende bukaera-XX.aren hasieran Rio de la Platako ekonomian. Erakusketak "Saraleguinea edo Jaques-Hippolyte Lesca jaunaren 3 bizitzak" izenburua darama eta Lescak Argentinan eta Lapurdin izandako bizipenak ditu erakusgai.
2008/09/08
Munduko euskal etxe gero eta gehiago interneten abantailak ikusi eta euren webgune propioa sortzeko pausua ematen ari dira. Webgune gehienek herrialdeko hizkuntza erabiltzen dute --Argentinan gaztelera, AEBetan ingelesa...-- baina gero eta gehiago dira euskarari dagokion lekua egiten ari zaizkionak ere. Horietako bat izan da berriki Bordeleko Euskal Etxea. 'Euskal Etxe baten webguneak euskarazko bertsiorik ez edukitzea mainguka ibilitzea bezalakotsu duzu', azaldu dio EuskalKultura.com-i elkarteko komunikazio arduradun David Mujikak, mundu osoko euskaldunek Bordeleko Euskal Etxearen berri izatea erraztuko duelaren esperoan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
