euskal diaspora eta kultura
2008/10/06
Coloradoko Euskal Etxea sasoi ederra bizitzen ari da eta kideen artean adiskidetasun sare estuak sortu ditu, euskara ikastaroei eta beste zenbait ekimenei esker. Horren adibide ona izan zen elkartearen azkeneko urteroko 'Mendiko Jaia', kide ugari bildu baitziren bertara, asko familia gazteak euren seme-alabekin. Elkartearen etorkizun oparoaren seinale izan daiteke hori, baina badaezpada --eta gorde beharreko tradizioak sortze aldera-- elkarteak hilaren 19rako deialdi berria egin du: Halloween... euskal erara, akelarrea alegia.
2008/10/03
Besteak beste Rosarioko Nafar Etxearen kantxan urriaren 18 eta 19an egingo diren 22 urtez azpikoen Munduko Pilota Txapelketako finalak ikusteko eta Santa Fe eta Mendozako probintzia argentinarrekin medikuak Nafarroan trebatzeko lankidetza akordioak sinatzeko bidaia ofiziala egingo du presidente nafarrak. Sanz-ek Pablo Sarasateren heriotzaren mendeurrena dela-eta antolatutako ekitaldietan ere hartuko du parte, aipatu bi probintzietako gobernadore, alkate eta buruzagiekin bilduz. Mendozan, azkenik, bertako Nafar Etxearen 25. urtemuga ekitaldietara ere bilduko da.
2008/10/03
Nazioarteko Pilota Federazioak, Argentinako Pilota Federazioak eta Rosarioko Nafar Etxeak hitzarmenean adostu bezala, VII. Munduko Pilota Txapelketa Santa Feko hiri horretan egingo da. Hamabi herrialdeetako federazio eta taldeen partaidetza izango du txapelketak, eta hiru modalitateetan jokatuko dute pilotariek: eskuz banaka eta eskuz binaka, larruzko paleta eta pala motza. Partidak Rosarioko Nafar Etxeko frontoian --36 metrokoa da eta Rosario ondoko Funes herrian dago-- ikusgai.
2008/10/03
Euskal Herri osoko sukaldari eta ostalariak lehian ari dira egunotan pintxo goxoena, deigarriena eta bereziena nork egingo, Euskal Herriko III. Pintxo Lehiaketan. Azken fasea Hondarribian egingo da datorren astearte eta asteazkenean eta irabazleak 3.000 euroko saria jasoko du. Horrezaz gain, Kaneta Argitaletxeak eta Hondarribiako Ostalaritza Elkarteak pintxo guztiak biltzen dituen liburu bat plazaratuko dute, Durangoko Disko eta Liburu Azokan aurkezteko, abenduan. Pintxoak dastatzeko gogoarekin gelditzen direnentzat, jarraian iazko irabazlearen errezeta ematen dugu. On egin!
2008/10/03
Egoitza Donibane Garazin du, Nafarroa Behereko hiriburuan, baina irakurleak Euskal Herriko zazpi probintzietan eta munduko euskaldunek osatzen duten zortzigarren horretan ere izan nahi ditu. Interneti esker egunkari elektroniko honetako berriak irakurleengan helduko dira, berdin da non, webgunearen bidez edo harpidetuek euren posta elektronikoan jasoko duten boletinaren bidez. Proiektu jaio berriaren buru Maite Ubiria eta Gaxuxa Arranbide kazetariak dira, kolaboratzaile sare zabal baten laguntzarekin.
2008/10/02
Ameriketako Elizondo familiako kideek datorren astean, urriaren 10etik 12ra egingo dute euren V. Nazioarteko Bilkura, Mexikoko Monterrey hirian. Hitzordura Kalifornia, Texas, Massachussets, Florida, Kuba, Mexiko, Coahuila, mexikar Durango eta Jalisco bezalako hirietatik heldutako kideak bilduko dira, Monterreyn bertan bizi direnez gain. Elizondotarren adar amerikar honek Nafarroako Baztango bailaran du sorrera. Bilkurako antolatzaile Edna Elizondok eginiko zuhaitz genealogikoan azken lau mendeetako senitartekoak ageri dira.
2008/10/02
Tolosako Galtzaundi Euskara taldeak eta Ibarrako Udalak komiki lehiaketa deitu dute, GaltzaKomik 2008 izenarekin. Edonork parte hartu dezake lehiaketan eta sariak honakoak izango dira: 400 euro 18 urtetik beherakoen kategorian eta 600 euro 18 urtetik gorakoen sailean. Lanak euskaraz idatziak izan behar dute eta lau orri izan ditzakete gehienez. Komikiak aurkezteko epea azaroaren 26ean itxiko da.
2008/10/02
Elkarteko barne araudiak dioenari jarraiki, bildua da Chacabuco herri argentinarreko 'Guillermo Larregui' Euskal Etxeko Ohiko Bitzar Nagusia, eta bozkak egin ditu datorren agintaldirako Zuzendaritza Batzordeko kideak hautatzeko, Eduardo Izurieta hautatuz lehendakari, Juan Carlos Zubeldia lehendakariorde, Elvira Guruceaga idazkari eta Sonia Armendariz diruzain, besteak beste.
2008/10/01
Argentinako euskal komunitateak Mercedes hiriko eskola teknikoari berebiziko oparia egin dio, Eusko Jaurlaritzak sustatzen duen programa bati esker: neska-mutilen lanbide heziketa tailerretarako bigarren eskuko fresatzeko makina, Euskal Herrian gehiago erabiltzen ez dena, baina Argentinako formakuntza zentroetan etekin handikoa dena. Jaurlaritzak, Argentinako euskal etxeen laguntzaz, horrelako hainbat dohaintza egin ditu aurten. Ekitaldian Suipachako Euskal Etxeko ordezkariak, eskolako zuzendariak eta Jaurlaritzaren ordezkari gisa, Cesar Arrondo irakaslea izan ziren.
2008/10/01
Euskal Kultur Erakundeak eta Antic-Pays Basque informazioaren gizartea sustatzeko agentziak 'Artean' gune birtuala sortu dute. Ekimen erabat berritzaile honi esker euskal kultura Second Life animaziozko mundu birtualaren barruan present egoteko erabilpena abian jarri da: Pays Basque uhartea du izena. Gaur asteazkena, urriaren lehena, arratsaldeko bostetatik bederatzietara lehen hitzordu bat antolatu da 'Pays Basque uhartea'-n, gunearen aurkezpen modura. Bere baitan ikusentzunezko edukiak aurkitu ahal izango dira, hala nola poesia, ipuinak, dantzak ...
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
