euskal diaspora eta kultura
2008/10/30
La Platako Euzko Etxeak ohar bat kaleratu du Argentinako euskal etxeei zuzendua, erantzuna eman nahiean azkeneko egunotan bere egoitza ondoko kaleetan agertu diren pintadei. Pintadok Euzko Etxea antolatzaile duen 2008ko Euskal Aste Nazionala hasteko bezperetan agertu dira, eta presoei buruzko esaldiak, Euskal Aste herrikoia aldarrikatzen dutenak, Euskal Herriaren askatasunari buruzkoak eta Euskal Herriko alderdi politikoren bati buruzkoak ere badira. Besteak beste Ibarretxe ostiral honetan euskal-argentinar komunitatearekin bilduko den eta Oskorriren emanaldia baitaratuko duen Club Atenasen ere egin dira spraymarrok.
2008/10/30
Teknologia berriei esker euskal-errusiar konexio indartsua sortu da sarean: batetik, Roberto Serrano euskal hizkuntzalaria, eta bestetik Roman Ignatieff etnografoa, Alexander Arkhipov hizkuntzalaria eta Alexander Grenkov webgune diseinatzailea. Euskal kultura Errusian ezagutzera emateko asmoarekin taldetxoak Gernika aldizkari digitala sortu du eta bere webgunetik Euskal Herria, euskara eta euskal literaturari buruzko informazioa ematen dute, besteak beste, errusieraz eta euskaraz. Etorkizunerako euskal literatur lanak plazaratuko dituen argitaletxea sortu eta Moskun euskal aste bat antolatzeko asmoa dute.
2008/10/30
Urriaren 25ean MMX taldeak Argentinako lehenengo kontzertua gauzatu zuen. Euskaltzaleak eta Eusketxe erakundeek Buenos Aireseko Mexiko kalean duten egoitzan egin zen emanaldia eta Iparraldeko musikari taldeak 70 bat lagun bildu zituen ekitaldira. Elkarteko patioa jendez gainezka, taldea osatzen duten Maialen Errotabeherek, Mixu Mixelenak eta Xabaltxek Diasporari begira osatu duten diskoko abestiak aurkeztu zituzten. Argentinan egongo den aste luzean zenbait emanaldi baitaratu ditu taldearen programak: Iparraldeko Euskal Etxean Piper Festan izan ziren, eta Buenos Aireseko Laurak Baten, Gral Rodriguez-eko Eusko Aterpean eta La Platako Euskal Astean ere joko dute.
2008/10/29
Kolore ugariz, erritmo handiz eta alaitasun kutsakorra bazter guztiak zipriztintzen ospatu zuen urriaren 12an bertako Gizataldeen Festa Concepcion del Uruguay herri argentinarrak, ospatu ere hiriko areto edo entzutegi berrian, eguraldi txarra izatekotan bertara bildu behar baitzuten hasieran Ramirez Plazan aire zabalean egitekoak ziren ekitaldiak. Hala gertatu zen, eta eguraldiak horretara beharturik, giro ona nagusitu zen norberaren jatorria ohoratzeko xedez antolatutako festa hitzordu hau. La Calle egunkari uruguayense-a bertan egon zen eta horri zor dizkiogu datozen lerrootako datuok.
2008/10/29
Argentinako Euskal Etxeen Liburutegien Sareak lan handia egin du azken hamar urteotan eta urteroko Bilerei esker liburutegiek harremanak indartu eta ekimen amankomunak jarri dituzte abian. Lankidetza hau 1998ean hasi zen, Mar del Platako Euskal Astean, eta emaitza oparoak izan ditu. 'Bagenekien ez zela erraza izango, baina oztopoei aurre egin genien eta gaur egun 20 liburutegitako ordezkariak biltzen gara. Datorren bilerarako 30 izatea espero dugu', azaldu dio EuskalKultura.com-i La Platako María Fernanda Astigarraga La Platako Euzko Etxea-ko liburuzainak. Hamarkada honetan taldeak ekimen asko sustatu ditu, horien artean FEVAk koordinatzen duen Argentinako Euskal Liburutegien Sarea. X. Bilera larunbatean egingo da, La Platako Euzko Etxea-ko Matxin Burdin Liburutegian.
2008/10/29
Colleen Asumendi Fillmore dietista euskal-amerikarra Idaho Estatuko (AEB) Haur Elikadura Programaren zuzendaria da eta euskal komunitatearen dietari buruzko ikerketa bat argitaratu du berriki, 'Basques of Boise: Adult Dietary Culture and Tradition: Basques: Culture and Tradition' izenburupean. 'Idahoko euskaldunak gogotik saiatu dira euren kultura gastronomikoa mantentzen eta etxean ikasi zituzten errezetak gorde egin dituzte', azaldu dio EuskalKultura.com-i Markina eta Laidako euskaldunen ondorengoa den aditu honek.
2008/10/29
Valparaisoko (Txile) Eusko Etxeko Gazteria partaide izan zen eta gizatalde atzerritar bat ordezkatu zuen 21 gazte taldeetako bat izan zen joan den urriaren 18an Bosgarren Erregio txiletarreko hiri honetan gauzatu den Kulturen IV. Gazte Azokan, Txileko Gazteriaren Institutu Nazionala (INJUV) eta Valparaisoko Udala antolatzaile. Euskal elkarteko lehendakari Archibaldo Uriartek oso modu positiboan aipatu du partaidetza eta euren Lau-urteko Planaren baitan kokatu du, Euskal Gizataldeen azkeneko Mundu Kongresuan gomendatutakoari jarraiki.
2008/10/28
Eusko Jaurlaritzaren Kultura Sailak ekimen berritzailea abiatu du 'Liburutegiak Topaleku' goiburuarekin. Egun Euskal Herrian bizi diren kultura ezberdinen integraziorako balioko du proiektu honek, aniztasuna, berdintasuna eta tolerantzia bezalako balioak gizartean eta etorkinen artean bultzatuz. Ekimen hau kultura-aniztasunaren kontzeptuan oinarritzen da, eta, horri jarraiki, hainbat liburu, aldizkari eta komunikabide inportatuko dira Euskadin bizi diren etorkinen jatorriko herrialdeetatik.
2008/10/28
Euskal Herria gonbidatu berezia izango du datorren larunbatetik aurrera eta hogeita hamar egunez hiriburu mexikarrean egingo den Mexiko Hiriko Arte Eszenikoen III. Erakustaldiak. Hogeita bederatzi izango dira Mexikoko eta kanpoko konpainiak, eta ehun bat eskainiko dituzten emanaldiak. Euskal Herritik Tanttaka eta Kukai-Logela taldeak bilduko dira, baita Kepa Junkera musikaria ere.
2008/10/27
Euskal mitologiak eta dibertsioak bat egin zuten joan den urriaren 19an Coloradoko Euskal Etxearen Akelarre Jaian. Estatu Batuetan hain ezaguna den Halloween jaia aurreratu eta elkartekoek euskal ukitu batekin ospatzea erabaki zuten. Jaiaren leloak euskal mitologian sakontzeko aukera aparta eman zien elkarteko kideei eta kondaira zaharretako pertsonaietan oinarrituriko mozorroak prestatu zituzten: Mari jainkosa, Amalur eta bere alabak, Ilargi eta Eguzki; Gaueko... Pertsonai bakoitzak bere istorioa azaldu zuen, 'izena duen guztiak izana du' leloa aintzat hartzeko gonbitea eginez. Arrakastatsua izan zen oso euskal Halloween hau eta datozen urteetan errepikatuko den usadioa bihurtuko denaren ustea dute elkartekoek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
