Necochea, Argentina. Ostiral arratsaldeak gustu guztientzako musika eta dantzak eskaini zituen, baita Necocheako hondartzetan aisialdi eta libertimendu une bat konpartitzeko gonbidapena ere. Sokatiran edo txinga-lasterketan parte hartzea edo, besterik gabe, itsasertzean matea hartuz lagun zahar horiekin berriz elkartzeaz gozatzea bat baino gehiagoren hautua izan ziren. Beste batzuek Santa María del Carmen Parrokiara musika korala entzutera hurbiltzea erabaki zuten. Iluntzean, berriz, ezinbesteko hitzordua Paris Antzokia izan zen, Aukeran Dantza Konpainiak “Migratzaileak” ikuskizun ahaztezina aurkeztu baitzuen. Eta, egun biziari amaiera emateko, Laiotzen musika bere alaitasun osoz aireratu zen 2023ko Euskal Aste Nazionaleko lehenengo erromerian.
Euskal etxeetako abesbatzen topaketa
Necochean bost abesbatza bildu ziren Euskal Aste Nazionaleko koru kontzertu ederra eskaintzeko. Amaieran denek batera "Ikusi mendizaleak" abestu eta txalo beroa jaso zuten. Partaide nizan ziren San Nicolaseko Euskal Etxeko "Errekatarrak", Jorge Mena gidari; Coronel Pringleseko Eusko Biltzar Euskal Etxeko "Eusko Alaia" abesbatza, Ana Maria Brouques zuzendari; Tandilgo Gure Etxea-ko "Gure abestiak", Martin Tumbarino zuzendari; "Euskaltzaleak" Buenos Airesko Euskaltegikoa, Ana Etchepare gidari; eta Cañuelasko "Denak Bat" Euskal Etxekoa, Leandro Vallejo gidari.
Aukeran-en ikuskizun ederra
Edu Muruamendiarazen zuzendaritzapean, Aukeran Dantza Konpainiak Euskal Asteko bigarren ikuskizuna aurkeztu zuen. Migrazioaren mugimendua dantzara ekarriz, ametsen, beldurren, oinaze eta itxaropenen inguruko hausnarketa eta gogoeta egin eta eragiten dute. Bertan egon ziren guztien oroimenean geratuko da “Migratzaileak”, Donostiako etorritako konpainia honen aurkezpen bikaina, txalo zaparrada amaigabe eta itxi batez eskertu zuten ikusleek.
Lagun bati bidali
Komentarioa gehitu
