euskalkultura.eus

Necochea, Argentina. Gazte partaideek elkar ezagutzea, elkarrekin momentu ederrak pasatzea eta, jakina, gozatzea euskal kulturaz gozatzen, hauexek ditu helburu nagusi Necocheako Euzko Etxea-k lehenengoz 2004an abian jarri zuen Hator Hona proiektuak. Eta zalantzarik gabe, xede hauek oraingoan ere beteko dira aurten uztailaren 13an Euskal Herritik argentinaratuko diren sei gazte euskaldunen eskutik.

Hiru astetan zehar, Gaizka Garde Izquierdo iruindarrak, Nagore Lekuona Lopez de Robles gasteiztarrak, Maitane Andueza Mujika eta Irati Urkiola Irigoien donostiarrek, Lierni Zangitu Arroyo aretxabaletarrak eta Junkal Lekuona irundarrak Necocheako euskal etxeko kideak Euskal Herriko kulturaren hainbat gaitan murgilduaraziko dituzte, bakoitza gai horietako bat edo gehiagoz arduraduta, hala nola Gaizkak euskal dantza eta panderoaz, Nagore euskal dantzez, Maitane euskara eta trikitixaz, Irati euskaraz, Lierni txalaparta eta kirolez eta Junkal trikitixa eta panderoaz.

Euzko Etxea euskal etxetik jakinarazi dutenez, urtero bezala, Hator Hona-ko partaideekin egingo diren klase guztiak komunitate osoari zuzenduak eta doakoak izango dira. Beste alde batetik, nobedade bat ere badatorkigu Necocheatik. 2012 honetako Hator Hona programan, beste euskal etxeetako kideei begirako ekintzak ere antolatuko dira. Izan ere, uztailaren 26an eta 27an, Argentinako neguko oporretako bigarren aste amaieran, tailer bereziak egingo dira, Necochean bizi ez direnek ere parte hartu ahal izan dezaten.

Aldi berean, Necocheako euskal etxeko gazteek Hator Hona iragartzeko bideo bat egin eta sareratu dute, programaren edizio guztietako irudiak baliatuta:

“Esker beroak eman nahi dizkiegu gutaz fidatu eta ekimenean parte hartzeko idatzi diguten guztiei. Hona etortzeko aukera guztiei ematea gustatuko litzaiguke baina, zoritxarrez, ezinezkoa da. Aurten kanpoan geratu direnak saia daitezke datorren urtean berriro, ea elkar ezagutzen dugun!”, adierazi dute Necocheako Euzko Etxea-ko gazteek www.hatorhona.blogspot.com euren blogean.