Donostia-San Sebastian. Pariseko Eskual Etxeari lotutako eta Pariseko euskal komunitatearen baitan 1981etik hona euskara eta euskal kulturaren alde lanean ari den Sustraiak-Erroak elkarteari eman dio 2010eko ENE Saria Eusko Ikaskuntzak. Urtero bezala 2006tik, munduan eta euskal diasporaren baitan euskara eta euskal kulturaren alde nabarmentzen den erakunde edo elkarte bati ematen dio Eusko Ikaskuntzak ENE Saria, sarituaren izena Abenduaren 3an jakinarazten duelarik.
Euskararen Nazioarteko Eguna 1949an eta erbestean sortu bazuen ere Eusko Ikaskuntzak, ENE Saria 2006an hasi zen banatzen. Ordundik honako elkarteei eman zaie: 2006an, Argentinako Mar del Platako Artaburu Euskaltzale Elkarteari; 2007an, Bartzelonako Euskal Etxeari; 2008an, Bordeleko Eskualdunen Biltzarra elkarte eta euskal etxeari; 2009an, AEBetako eta Kanadako euskal elkartean biltzen dituen North American Basque Organizations Incorporated-i (NABO) elkarte iparamerikarrari.
Lagun bati bidali
Komentarioa gehitu
