euskalkultura.eus

Gral. Roca, Argentina. Daraman bisita egitarauarekin jarraituz, Coronel Moldeseko euskal etxeko lehendakaria den Marita Echavek 'Euskal baserrietako sukaldaritza' liburua aurkeztu zuen joan den igandean, urriaren 30ean, General Rocan. Bertako lehendakari Emma Trapagarekin eta Rocako euskal erakundeko beste kide batzuek laguntzaile, larunbatean zehar prestatu zituen Echavek aurkezpenerako gauzak.

[Euskal etxeko sukaldariek lagundu zuten bazkaria prestatzera (argazkiaEE)]

Igandean, Ghirardelli familiaren Agrestis Upeltegian zen hitzordua eta 150 bat lagun bildu ziren aurkezpenera eta bazkarian parte hartzeko. Kanpoan muntatutako sukalde eta parrillan, Echavek eta bere laguntzaileek bokatak, txistorra piperradarekin, txerria, kroketak eta oilaskoa prestatu zituzten. Postreaz ere arduratu ziren sukaldariak. Goxuak eta Agrestis Upeltegiko ardoek osatu zuten menua.

Bazkalostean, euskal etxeko txikiek dantza batzuk eskaini zituzten eta bilbainadak kantatu zituzten euskal etxekoek. “Hau bezalako elkarretaratzetan, janariak jendearen bilgarri eta bateragile gisa daukan indarraz konturatzen naiz”, adierazi zigun Marita Echavek bisita bukatzean.

[Txikiak dantzari zritu ziren eta jolasteko aukera ere izan zuten (argazkiaEE)]

Datozen asteetan beste konpromiso batzuk ditu Coronel Moldeseko andreak Argentinako euskal etxeekin. Azaroaren 4an -- bihar -- Chivilcoy-n, 5ean Suipachan eta 6an Villa Mercedes-en izango da. Ondoren, azaroaren 18an Rauch-era abiatuko da eta 25ean Arrecifesera.

Bitartean eta bidaiatzeaz aparte, beste betebehar bat ere badu 'Euskal baserrietako sukaldaritza' testuaren egileak, Marita Echavek sukaldaritzari buruzko zutabe bat idazten baitu El Moldense eta Rio Cuartoko Puntual egunkarietan.