euskalkultura.eus

Arrecifes, Argentina. Zenbait ekintza zeuzkaten prestatuak Arrecifesko euskaldunek urte amaierako jairako. Agian, hunkigarrienetako bat Angelica “Cusa” Etchaniz-i dantzatutako Aurreskua izan zen. Juan Ignacio Saez Abarrateguiri egokitu zitzaion dantza egiteko ohorea.

[Garrantzi handiko partaidetza izan zuten etxeko dantzariek urte amaierako jaian. Hemen helduak Fandangoa dantzatzen]

Ondoren gainontzeko dantzariek ere hartu zuten pista euren trebetasuna erakusteko. Kalejira batekin hasi ziren helduak, eta gero Fandango eta Arin Arin egin zituzten. Ertainek, berriz Koadrile aurkeztu zuten eta etxeko txikienak euren Fandango eta Arin Arin bertsioekin gailendu ziren.

[Taldeko ertainek irakasleekin dantzatu zuten]

[Kalejiran sartu ziren txikienak pistara]

Maral musika taldeak urteko azken kontzertua eman zuen bere herrian. Betiko abestiekin, Lau teilatu, Eperrak, Ikusi Mendizaleak, eta baita nobedade batzuekin ere – Ken Zazpiren Ilargia, besteak beste – musikari arrecifestarrek eman zioten agurra 2010 urte arrakastatsuari.

[Ilargia abestiaren bere bertsioa estreinatu zuten Maral Taldekoek]

'Argentinan Euskaraz' 20. urtemugaren urtean euskarak ere oso leku berezia izan zuen jaian. Stand bat montatu zuten antolatzaileek eta gonbidatu guztiek hortik pasatu ziren euskara pixka bat ikasteko.

[Teresa de Zavaleta irakaslea arduratu zen standaz]

[Ospakizunarekin bukatzeko zozketa egin zen gonbidatuen artean. Irabazleak: Maral Taldeko kideak. Saria... lagunekin partekatu behar izango duten  txerri goxo-goxoa!]

Dantzak berandu arte ikusi ahal izan ziren Arrecifeseko euskal etxean; eta musika ez zen isildu --ezta argia joan zenean ere-- ordu txikiak arte. Inguru herrietako lagunek ere hartu zuten parte joan den igandean egindako jaian, Suipacha, Buenos Aires eta Pilarrekoak, hain zuzen.