Joseba Tapiak (Lasarte, 1964) pentagramaren zurruntasuna ezin eramanik, umetan soinu handia utzi eta txikia hartu zuen. Hamazazpi urterekin azaldu zen lehen aldiz plazan bakarrik, 1981ean, Donostiako Igeldon. Euskal Herriko Trikitixa Txapelketak irabazi zituen 1986an eta 1988an. Hogeita zazpi urte daramatza Leturia pandero-jolearekin bikote gisa, Tapia eta Leturia taldean. Ibilbide honetan bederatzi disko kaleratu dituzte (eta askoz ere gehiago Tapiak formatu batekin edo besterekin). 1998an ekin zion bakarkako kantagintzari. Eta tira eta tunba laneko abestiek gerra bat dute ardatz. Lan honek biltzen dituen hogeita bi kantuak garai historiko jakin batean mamitu ziren, eta garai hartan hartzen dute arnasa: gerra aurreko giroa, bi bandoen osatzea, foruak, erlijioa, errepublika, monarkia eta enparauak.
Kontzertua CAT-en izango da gaueko 22:00etan. Sarrerak 5 euro balio du (bazkideak 2,5).
Lagun bati bidali
Komentarioa gehitu
