Jon Olano. Carlos Garaikoetxea, Jose Antonio Ardanza, Juan Jose Ibarretxe, Patxi Lopez eta Iñigo Urkullu Eusko Jaurlaritzako lehendakari eta lehendakari ohiek bat egin dute lehen Eusko Jaurlaritza eratu zeneko 80. urteurrena ospatzeko ekitaldian, Gernikako Batzar Etxean. Nork bere aginte makila eraman du, eta guztiak batu dituzte Jose Antonio Agirrerenarekin.
Ekitaldian, musika, dantza eta bideoak erabilita Agirreren eta Mari Zabalaren erbestealdia eta Bigarren Mundu Gerra kontatu dute; eurek eta milaka europarrek nazien bonbardaketei nola ihes egin zieten azaldu dute, "animaliek baino tratu okerragoa" jasota.
Urkulluren hitzaldiarekin amaitu da ekitaldia. Agirre buru zuen Jaurlaritzaren "akordiorako gaitasuna" goraipatu du Urkulluk: "Agirre lehendakaria gure izaeraren ispilua da; kultura, hizkuntza, nortasuna duen herri baten ispilu; Jaurlaritzaren bidez erbestean edo demokrazian hazten den herri baten ispilu; pertsona oinarri eta ardatz duen gizartearen ispilu".
Gainerako lehendakariek ere Agirre izan dute gogoan: "Egoera zailetan lider mitikoa" izan zela nabarmendu du Garaikoetxeak, eta "askatasuna eta demokrazia sentitzen" zituela azpimarratu du Ardanzak. Ibarretxek adierazi du Agirre "demokrata eta abertzalea" izan zela, eta Lopezek, berriz, Agirrek eta haren gobernuak "askatasunen eta autogobernuaren defentsa" ordezkatu zutela.
Send to a friend
Add comment
